Read Aloud the Text Content

This audio was created by Woord's Text to Speech service by content creators from all around the world.

Text Content or SSML code:

أبو الحسن #علي_النوري الصفاقسي… شخصية تونسية طواها النسيان ! كيف تحل كتاب #القرآن، وتمشي للصفحات الأخيرة وإلا الأولى اللي فيه اللي فيها التعريف بالكتاب، عندك إمكانية كبيرة باش تلقى فيه "وأخذ بيان أوائل أجزائه الثلاثين وأحزابه الستين وأنصافها وأرباعها من كتاب غيث النفع للعلامة الصفاقسي"... موش لازم يكون كتاب قرآن تونسي راهو، ممكن تلقاه في العالم الكل... بقى شكونو ها الصفاقسي اللي خذاو من كتابو مرجع في ضبط كتب القرآن في العالم ؟ السيد هذا اسمو أبو الحسن علي النوري، وأصل لقبو العائلي شطورو، ثمة شكون يقول أصلها من قرية شتورة في لبنان جات مع الجيوش العثمانية باش تحارب الإسبان في تونس في القرن 16، واستقرت بصفاقس.. والأرجح أنها عائلة أندلسية هاربة من بطش الإسبان استقرت بصفاقس بعد عام من سقوط الأندلس... والحق كانت عائلة متواضعة فقيرة كيف صفاقس الكل، وحتى البلاد الكلها في العهد المرادي ! سي علي هذا تولد عام 1643، وملي هو صغير مغروم برشة بالقراية والعلم، قرا عند شيوخ صفاقس المعروفين الكل في وقتو، وأبرزهم #أبو_الحسن_الكراي اللي قرا في الأزهر في مصر... وكيف كمل العلم اللي عندو حب يزيد، ياخي مشى لتونس وعمرو 14 سنة فقط باش يزيد يقرا ويتعلم... وكان فقير لدرجة أنو كان يشري تمر ويغليه في شوية ماء، ويشرب الماء يفطر بيه، ويقعد يعاود في العملية هاذي حتى توفى حلاوة التمر ياكلوا وياخذ غيرو... حتى فاقوا بيه فاعلي الخير وثمة شكون منهم خذاه في كفالتو يصرف عليه. 5 سنين عداهم في تونس بين #المدرسة_الشماعية والمنتصرية و #جامعة_الزيتونة طبعا... من تونس مشى للأزهر في #القاهرة وعمرو 19 سنة، وفي #الأزهر ظهر اللي سي علي هذا عندو طاقة كبيرة لاستيعاب العلوم اللي يتلقاها الكل : فقه، طب، صنعة، تجارة.. اللي تعطيه يقبل... قرا على يدين برشة مشايخ، وخذا الديبلومات اللي ينجم ياخذهم الكل... وتعلم #الحياكة والتجارة، وظاهر فيه يبدا يبيع ويشري غادي وحرك الدولاب... ومن بعد حن لبلادو ياخي قرر يرجع لصفاقس... وقتها قلوا واحد من المشايخ متاعو "يا علي يا نوري اذهب نوّر المغرب"، هو حتى للوقت هذا مازال شطورو راهو، أما من الكلمة هاذي عجبوا الاسم الجديد... يعني مشى لمصر شطورو روّح نوري ! الشيخ روّح من مصر عمرو 25 سنة مليان بالعلم والفلوس، وأول ما عمل بنى زاوية باش يقري فيها، وما نساش صغرو وكيفاش تعذب هو باش قرا بين تونس ومصر، ياخي بنى فوق الزاوية بيوت يسكن فيهم الطلبة اللي كانوا يجيو يتعلموا من عندو من خارج #صفاقس... وكان مقسم نهارو بين التدريس والخياطة اللي كانت صنعتو الأساسية واللي كانت وقتها مهنة راقية وتجيب برشة فلوس وما بين الكتيبة... طاح ينتج في الكتب على بعضو : في الفقه وعلوم الدين، وفي التجويد، وفي التصوف، وحتى في علم الفلك ! وكيف ما قلنا في الأول، كتاباتو هايلة، إلى درجة أنو كتابو #غيث_النفع_في_القراءات_السبع تنسخ بخط اليد في مصر وسوريا وتركيا وغيرهم، وولى مرجع مهم في ضبط كتب القرآن حول العالم !! الأهم من هذا أنو البلاد كانت خايضة تحت حكم #المراديين اللي دخلوا بعضهم بعد ما مات #حمودة_باشا_المرادي، وصفاقس البعيدة على العاصمة طول الوقت هادين عليها القراصنة الجنويين والمالطيين يجيوا يفكوا الأرزاق والعباد يهزوهم عبيد، خاصة الصغار منهم... هاكة علاش ثمة دعوات شر معروفة في صفاقس "يبيعك في جنوة" وإلا "يسمعك الأذان في مالطا"... سي علي النوري فد من الحكاية هاذي، تلموا كبار البلاد وشيوخها قالوا آش نعملوا ؟ قللهم ياخي هوما خير منا ؟ نحاربوهم طبعا ! أفتى بوجوب الجهاد البحري على الناس الكل باش يدافعوا على رواحهم، وقاد حملة لبناء السفن، جات التبرعات والهبات، وبداو الصفاقسية يصنعوا في السفن الحربية ويسلحوهم، وبداو يخرجوا يدافعوا على رواحهم في البحر... اللي كانوا يجيو يغوروا عليهم ولاو هوما الضحايا، وبقعة ما يفكولهم صغارهم ولاو الصفاقسية يروحوا بالغنائم من عند الفلايك المعتدية... وصلت الحكاية في فترة من الفترات بعد حياة علي النوري بشوية حتى أنو البحر من راس المخبز على الحدود الليبية حتى لبحذا تونس العاصمة متاع الصفاقسية، أي براني يجي يغور ينحيولوا جد والديه... حتى الدولة الحسينية عجبتها الحكاية ودعمتهم... مع هذا اللي عملوا الكل علي النوري ما سلمش من السياسة، ومشاو جماعة لمراد الثالث، هاكة السفاح المعروف باسم #مراد_بوبالة، قالولوا راهو سي علي النوري هذا قاعد يخطط باش ينقلب عليك، أفطر بيه قبل ما يتعشى بيك... ثمة شكون من فاعلي الخير وصل الخبر لعلي النوري وقلوا اللي جنود الباي باش يجيو يغتالوه، ياخي لبسوه دبش مرا وهربوه من صفاقس لبقعة ما بين تونس و #زغوان، ومن بعد مشى لـ #بوعرادة وعمل فيها زاوية ورجع يقري !! الله غالب مبلي، ما ينجمش يقعد ! الحاصيلو في بوعرادة تعرف على #إبراهيم_الشريف اللي انقلب على مراد بوبالة وخذا حكم تونس في 1702، وتعرف على #حسين_بن_علي اللي خلف إبراهيم الشريف في الحكم وقت أسروا داي الجزائر عام 1705 ومنو هو بدات الدولة الحسينية... والزوز انبهروا بيه وعرضوا عليه أرفع المناصب الفقهية والسياسية ورفضهم ! رجع لصفاقس يقري في زاويتو، وقبل ما يموت حط وصية قال فيها ادفنوني مع عامة الناس أنا وتلامذتي وأولادي، وشرى المقبرة اللي باش يتدفن فيها، ووصى باش ما يعملولوش قبة فوق قبرو على خاطرو عالم وموش ولي صالح... وهاكة اللي صار... وقت توفى خلى مكتبة عظيمة، ما كانش يسمع بكتاب ويفلتو، يبعث باش يجيبوهولو من كل بقعة، حتى قال عليه الوزير السراج في كتابو الحلل السندسية اللي عمرو ما سمع بمكتبة أكبر منها ! وتبرع واحد من أحفادو بالمكتبة هاذي للمكتبة الوطنية عام 1969. المقبرة اللي تدفن فيها علي النوري تنحات تو في صفاقس، وولات المنطقة تتسمى صفاقس الجديدة... لكن وقت جاو المقاولين ينحيو قبرو من جملة القبور، تلموا الناس الكبار والعارفين وقالوا مستحيل يتنحى قبر الشيخ علي النوري... هاكة علاش مازلنا نلقاوه لليوم في جردة صغيرة مزيانة وفوقو رخامة صغيرة تعرف بالشخصية الاستثنائية هاذي...